Channel 
Contributing € 7
Colaboro!
Agradecemento personalizado na web do proxecto.
Desgravarías 5,6 € polo que o teu gasto real pode ser 1,4 €. Máis info: https://gl.goteo.org/calculadora-fiscal
> 06 Co-financiers
A Primeira Colleita
29 | 10 | 2026
A Primeira Colleita
Sinceramente, descoñezo cal é a definición de “colleita”. Ou, mellor dito, cando algo se pode considerar colleita ou un simple engado da natureza.
Grazas a vós no inverno do ano 2023-24 puidemos plantar máis de 300 castiñeiros na Leira A Montán, unha hectárea de terreo xuntada a base de pegar anacos de leiras de 6-10 metros de ancho por uns 200 de longo. En realidade, e isto é un segredo entre nós, un deses anacos aínda non é noso; só apalabrado. Outro segrediño, tamén entre nós e que non saia de aquí, é que outro medio-anaco non ten dono. Mellor dito, está a nome dun que morreu hai 40 anos, os seus fillos emigraron (debe haber un vivo) e por aquí non acordan xa cando viñeron por última vez e, os netos, a ver se aparecen.
De todos eses castiñeiros, o ano pasado collemos unha presada de castañas da variedade xudía. Que nin ben nin mal, non se agardaba porque tampouco puidemos facer polo cultivo dos castiñeiros todo o que quereríamos. Tamén é certo que un dos lotes plantados saíu malo malo: secaron 50 e pico plantas das 60. O viveiro repúxonos as marras e replantamos o inverno pasado. Dentro dese lote estaban a maioría das que escollestes para apadriñar os que viñérades ao día de portas abertas de abril de 2024. Si, non volo dixemos porque non gustamos de dar malas novas. Agora xa está.
Este ano temos un colaborador máis na casa polo e puidemos regar bastante mellor que ata o de agora e sen deslombarnos tanto. Houbo que rachar o peto, pero o esforzo pagará a pena. E, a novidade máis grande de todas, comezamos a instalar rego por goteo en varias leiras. A día de hoxe nesta da Montán só en 40 castiñeiros. Estivemos a probar e a aprender como facer a instalación e agora que lle perdemos o respecto ao conto, estamos certos de que durante este inverno e primavera imos poñer o rego en todas as árbores de todas as leiras. O cambio climático está aquí e deste xeito conseguimos algo de independencia sobre o réxime de choivas que nos poida tocar.
Este mes de outubro de 2026 temos A PRIMEIRA COLLEITA. Estamos a apañar varios quilos de castañas desta leira. Si, no terceiro ano de plantación e tal e como estaba prognosticado. Na aldea non o cren, seguro. E non será moito, pero é a nosa primeira colleita, de árbores plantadas por nós. E moitísima castaña boleca, que é como lle chaman aquí as castañas que quedan sen criar ou abortan. As razóns? Desde problemas na polinización a, sobre todo, falta de auga e nutrientes. Así que o ano que vén o normal é que toda a leira estea normalizada, é dicir, que todos os castiñeiros dean algo de produción, pouca ou moita en función da súa propia personalidade, pero produción ao fin e ao cabo; porque poderemos regar todo o que precisen. E nós seguiremos aquí para apañala. Aínda que haxa que dobrar o lombo.
Seguimos.
Yorumlar
María Esther Bernárdez Parcero
Hace 2 days
Que ben! Tes que facernos unha guía para o do rego, que seguro a moitos interesa. Unha aperta!
Inicia sesión para dejar un comentario